Kèrkelike fiëste die eigelik gebónje zeen aan ein of twië daag, trèkke zich dao niks miër van aan. Kerstmis is dao ein good väörbeeldj van. Maondje van te väöre ligke in de winkels de attribute klaor väör de gebaorte van Jezus op 25 december mèt kadoos en lekker aete te vere. Achter ein paar jaor beginne we al aan de väörbereidinge van het fiëst, nog väör Maria zjwanger is. In feite is kerstmis al gein kèrkelike aangelaegeheid miër ómdet de meiste miense amper de christelike achtergróndj d'rvan kinne. Aan alles kumtj ein inj. Mich tuntj: het kerstfiëst van de kèrk haet het bekans zevetiënhóngerd jaor volgehaoje. Det de traditie van karakter is verangerdj noe d'r sjteeds minder geluivige zeen, is logies.
Waat is gebleve is in eder geval de hulst, de sjtroek of boum mèt roeëj besse woeëvan de blajer greun blieve. Dao mook mien moder vreuger kerstsjtökskes van en det duit Ellie noe nog. De hulst is ein symbool van kerstmis. Zien blajer zeen hel en höbbe sjerpe sjtaekels langs de renj. En dus verweze ze väör de geluivige vreuger nao de kroeën van däör dae Jezus opgezatte kreeg. De roëej besse symbolizeerdje het blood det Jezus haaj verlaore. Mer de miense van väör het christendom haje ouch al beteikenis gegaeve aan de hulst. Zuuj geluifdje det ze mèt de sjtaekelblajer kwaoj geiste, hekse en demone kóste wegjage en zich kóste besjerme taege ónwaer en bliksem. Vanwaege de greun blajer waas de hulst väör häör ouch het symbool van het väörjaor, de haop op eine goje tied väör sjtal en veldj.
Ellie en ich höbbe twië hoeëg hulstbuim. Eine hingtj kletsvol mèt roeëj besse. Kerstmis of neet, geluivige en óngeluivige kinne d'r eder häör eige symbool in zeen. De angere hulst hingtj nog voller mèt prachtige gael besse. Det saort zuus se neet zoeë väöl. Väör ós is dae gaele hulst het symbool van optimisme, energie, gelök en creativiteit, ómdet die kläör duit dinke aan zón en bliesjap. Ein fiëst väör geluivige en óngeluivige. Wieväöl daag det fiëst doertj sjteit väör nemes vast. Mesjien is det mer good ouch.
2025 waek 50
