In oos taal hètj het kattesjtert, in het Nederlands is het heermoes. Ich höb het äöver ein ónkroed det ich de lètste jaore wie ein plaog zeen opkómme. Bie mien weite waas det vreuger lang zoeë erg neet. Zelf höb ich d'r allein last van op ein sjtökske blomehaof tösse mich en de buurman. Ich kan het mèt de sjoefel gemaekelik biehaoje tot noe toe. Mer op anger plaatse zeen ich wie de kattesjtert blomehäöfkes en volkstuine äöverwoekertj. Het kroed woeë se thië van kins make, kan eine kleine halve maeter hoeëg waere.
Dae thië is troewes heilendj väör zoeëget alles, as se internet moogs geluive: genaeze van blessures en operaties. Aansjterke nao het kraombèd. Hernia en sjlietage in de knäök, sjlechte naegel, kaal waere en osteoperose. Eigelik mót ich mich sjöljig veule dat ich zoeëväöl heil väör mien gezóndjheid eders kiër weer mèt de sjoefel ein köpke kleiner maak.
Bie mien moder thoes haje wae ouch kattesjtert in de gróndj zitte vreuger, mer neet väöl. Waarsjienlik ouch ómdet we net wie bienao ederein in dae tied regelmaotig sjoefeldje. Daomèt verlaor de kattesjtert eders kiër ziene kop. Väör deze oerplantj oet de tied van de dynosaurus, is het verlees van zien köpke aevel neet erg. Zien lief is namelikk óneindig lank. Dus nao eder sjoefelbäört gruutj d'r nao ein pueske weer eine noewe kop aan. Gelökkig haoj ich van sjoefele, maak ich michzelf mer wies. Wie mien broor en ich èns ein deep gaat móste grave bie mam in de haof, bleve we de wortels van de kattesjtert mer taegekómme. Wie deep we ouch ginge. Ich geluif det we tot zeker twië maeter zeen blieve grave, wie we het mer höbbe opgegaeve väör het begin van die kattesjterte te vinje. Dao kwoom gein inj aan. Ein kat haet zeve laeves. De kattesjtert liektj het iëwig laeve te höbbe.
De kattesjtert is ein oerplantj, ein saort laevendj fossiel. Baove de gróndj is het eine greune sjtengel met knuipkes. Óm de knuipkes gruje kranse van greun zie-tekskes. Mét get fantasie liektj het eine kattesjtert. In het echt is ein lestig woekerkroed.
2026, week 23
