Dae sjtiktj Slevenhiër nao de ouge. Dees Remunsje oetdrökking beteikentj hetzelfdje as Klage mèt gezónj bein. Ich kwoom häör taege op facebook en ze kumtj oet de sjäörkalender dae Veldeke Remunj dit jaor haet oetgegaeve. Väöl van die oetdrökkinge kinne we ouch aan de goje kantj van de Maas. Mer lang neet allemaol. De Remunjse taal is creatief. Zoeë sjpriks se neet as se van Kaeveliëer kums. Det kriegtj emes dae nötte kal duit te huere. Wie de meiste Limburgse oetdrökkinge, höbbe ouch de Remunjse ein volks karakter. Ich sjrief ze in mien eige dialect, dan loup ich neet de kans det ich het Remunsj versjangeleer.
Det is de bloom van de käötel is ein sjpottendje maneer van zègke det het sjtinktj. En as se Nao de fraanjele-camping geis, bès se óngerwaeges nao ein nudiste-camping. Van emes dae get duit waat hem zal opbraeke, zègke ze in Remunj Dae liërtj nog moere sjave. As se te laat op eine aafsjpraok kums, mós neet gek opkieke as emes zaet Het book is al ómgedrage. Lichtelik is die oetdrökking gebaore in de kèrk. Sommige miense zitte op de cente. As zoeë emes taege alle verwachtinge in royaal is mèt gaeve, zègke ze in Remunj Dem is ein ei oet de vot gevalle. Äöver de doeëd is het Remunsj plasties. Emes dae haost aan de bäört is Ruuktj nao de sjöp. As het zoeë wied is, waertj gezagdj De is gesjtoptj mèt rouke.
Sjtuur eine aezel nao Paries, hae kumtj trök aeve wies. Det riemselke kan baeter neet äöver dich gezagdj waere. Dan bès en bliefs se in angermans ouge dóm. Dóm miense weite dök nörges van en dan zègke ze in Remunj Dae kiektj asof hae in Zjwame is gebaore. Rome sjteit in Remunj baeter aangesjreve as Paries en Zjwame. Want van emes dae väöl vreugtj, zègke ze in de sjtad van Christoffel Mèt vraoge kums se in Rome. Rome is ouch de sjtad van de meiste heilige. Mer Remunj haet ein apaart saort heilige. Emes dae allemans vrundj is, mer thoes de tiran speeltj, neume ze in Remunj Eine sjtraotheilige.
2025, waek 40
