De väörige waek leep ik door de volkstuintjes op de paad recht bie mich taegeäöver, wie mien oug op get bezunjers veel. Ich waas al väörbie, mer as ich einmaol noesjierig bèn gemaaktj, wil ich het weite ouch. Dus ich drejdje mich óm en herkindje het väörwerp drek: eine besjiljerdje sjtein. Hae mós d'r pas zeen neergelagdj, dao zoot nog gein sjpetje módder op. Ich haaj al èns iërder zónne sjtein gevónje. Mich waas vertèldj det wichter det deje en det degene dae zónne sjtein vónj hem op ein noew plaats neer mós ligke. Mer dit waas angers. Dae sjtein waas bewustj gesjiljerdj väör de plek woeë ich hem haaj gevónje, want op de väörkantj sjtóng ein sjoeën tafereel äöver tuiniere. Op de achterkantj waas get gesjreve: Gevonden? plaats een foto op: F Kei Tof o.v.v. 6081 = leuk.
Ich wool de sjiljer m/v det plezeer waal doon en ein foto op Facebook plaatse. Dus ich ging op zeuk nao Kei Tof 6081. Det adres waas nog waal te vinje. Zelfs ein account aanmake lökdje mich. Det is väör eine digibeet wie ich bèn al ein hiel prestatie. Mer toen begós het pas. Ouch as ich precies deej waat ich volges de computer mós doon, lökdje het neet väör die foto op Facebook kwiet te waere. Normaal dink ich dan: 'Bekiek het mer, meneer de computer. As se get van mich wils, kins se dich ouch waal de meute doon väör dudelik te zeen.'
Wie ich het gedaon höb, kan ich neet naovertèlle, mer ich kreeg de foto op Kei Tof geplaatstj. Ich sjreef d'rbie det ich haopdje det de foto bie de juuste persoeën terecht zooj kómme. Det bleek ein dame te zeen die blie waas mèt het bericht. Ich waas blie mèt de sjtein en mèt de noewe waereldj dae ich haaj óntdektj. Dae van de kei-sjiljers die prachtige sjiljeringe make op sjtein die ze dan örges wegligke. Waem gelök haet, vintj d'r eine. En dae dao neet op kan wachte kan op Facebook zien hert ophaole. Dao zeen die sjtein gratis te bewónjere op Kei Tof.
2023, waek 14
