Het waas hoeëgzomer en drueg en het haaj al hiël lang neet miër geraegeldj. Het gerei in de haof sjruudje weg in de hits van de zón. Sjproeie waas verbaoje. Toch sjtóng de vader van eine vrindj op klaorleechte daag mèt de tuinsjlang ziene mooshaof naat te make. Ich vroog of hae neet wis van het sjproeiverbod. Hae goof mich ein antjwaord det ich op det moment sjtoer vónj: 'Jóng, väör het water op is, mós se zorge det se dien portie höbs gehadj.' Wie ich d'r later äöver naodach, wis ich det het neet sjtoer waas. As we zunig mótte zeen mèt drinkwater, tèltj det väör allemaol. Dae miens waas geine heilige, mer zeker ouch geine verkiërdje. Intaegedeil, het waas eine helle wèrker, neet te beroerdj väör emes te helpe. Det klein bietje water waat hae aan de haof goof, kós het versjil neet make, in zien ouge. En zoeë dinke väöl miense as het äöver groeëte probleme geit.
Verbaeter de waereldj, begintj bie dichzelf. Emes mót beginne mèt het versjil te make. Zoeë is sjtoppe mèt rouke ouch begós. Det waas ein groeët probleem. Ein groeët probleem van noe is het sjpuite van gif op sierblome. Bie sommige saorte mót det minstes eine kiër per waek gebäore. Angers waere de blome of de blajer, de wortels of de bol aangevraete door insekte. Dan levere ze de kweker niks op. Lelie, roeës, tulp, narcis, hyacint en amaryllis beväörbeeldj sjtaon sjtief van het gif. Det gif hètj in de läögetaal van de gifmingers troewes neet gif, mer 'bestrijdingsmiddel' of zelfs 'gewasbeschermingsmiddel'. Gemingdje boekette zeen ein saort voelnisbak vol reste van allerlei saorte gif.
Dao wool de gemaendje Zutpen get aan doon. Dus goof ze bie fiëstelike gelaegenhede gein bloomboekette miër. Verbaeter de waereldj, begin bie dichzelf. Zutphen liëtj zeen det het kan. Mer... gein blome bie ein diamante broelof? Det beveel ouch neet. Dus noe kómme B & W weer mèt blome nao de receptie, mer allein biologies gekweekdje. Det is ein good väörbeeldj aan de burgers. Emes mót beginne mèt het versjil te make. Det is pas sjtoer.
2025, waek 6
