Èns in het jaor is d'r Vreigele biej het kèsjtiël. Det kesjtiël is Aldenghoor in Haelen. Vreigele biej het kèsjtiël is ein saort talk-show, georganiseerdj door de Sjtichting Haele Laeftj. Die is opgericht väör get laeve in de broewerie te haoje. Bekans alle dörpe zitte mét dezelfdje ozel: vereiniginge, winkels en cafés verdwiene, en óngertösse ouch al buurthoeze en sjoeële. De vastelaovendj verwatertj, kèrmisse, dörpsfiëste en sjporttournooie haoje d'r mèt op en kèrke mótte haost sjloete. Het dörp as hechte gemeinsjap is aan het verdwiene, en daomèt ouch de gemeinsjapszin.
In Vreigele biej het kèsjtiël gebäörtj miër as ich hie kan neume. Houfdpersoeëne zeen veer gaste die eine bandj höbbe mèt Haelen. Ze hove d'r neet te woeëne of beroemdj te zeen, as ze mer ein good verhaol höbbe. Interviewer Ralph Bongaerts kriegtj miense op ein charmante maneer aan het kalle. Det geit soms deep, wie dees reis mèt Jeroen Poels, de bevlaoge miMakker, dae van hert tot hert in contact probeertj te kómme met patiënte woeë det neet mäögelik liektj. Joop Broens, coach van gehandicapte toptennissers, vertèldje oprecht äöver ziene sjechte sjtart in het laeve en äöver de offers die hae väör zien internationaal carrière haaj gebrachtj. Het gesjprek mèt Jan Leenders, bassist en pr-man, verleep lóchtig mèt väöl verhaole äöver sores en gelök van eine beginnendje beatgroep. Het begós allemaol mèt ein iërste optraeje det op het lètste moment neet doorging. Natuurlik ein centekwestie. Zien verhaole en die van Ans Smeets gove ein prachtig tiedsbeeldj van de jaore '60 en '70.
Ans kreeg de lachers gemaekelik mèt. Het is mèt-eigenier van ein Nunhems restaurant det is geneumdj nao ein voetbalclub. Ans vertèldje waat het väör hem as kind beteikendje op te greuje in ein horecazaak. In die zaak kwoom èns ein hoeshaoje binne. Ederein besjtèldje get te aete, allein de zoon wool niks, waat de vader ouch probeerdje. De jóng leet zich neet äöverhaole en zoot ziene tied oet op eine cola. Wie pap aafraekendje kwoom de aap oet de moew. De zoon waas fan van ein anger club en wool dus niks aete van Feyenoord.
2024, waek 46
