Het haet effe gedoerdj, mer ich bèn dan toch 71 jaor gewaore. Det ich zoeë wied zooj kómme, is ein klein wónjer. Det wónjer begós al bie mien gebaorte. Dao weit ich zelf neet väöl mier van aaf, mer mien moder haet mich alles vertèldj. Ze haaj aan mich ein zjwaor bevalling. Neet det ich zónne weuste baby waas, juust neet. Mer óm ein af anger raeje wool ich d'r neet oetkómme. De vroedvrouw bleef aan het plare, zónger succes. Nao drie daag mertele waas mam ram kapot en väör mich zoog het d'r neet good oet. Oze dokter oet Naer waas mèt vakantie.
Wie nemes het mier wis, waerdje de militaire arts van de kazerne oet Remunj d'r bie gehaoldj.
Dae zal mich waal nao boete höbbe gecommandeerdj: 'Voorwaarts mars.'
Efeng, ich waas d'r dan toch op 30 april, ein te klein, fien jungske mèt ein flink óngergewicht. Mer mèt ein gooj kaer. In deze tied zooj ich achterein in de couveus zeen gelagdj. Ich mós mich zeen te redde in ein vóchtige krotwuening woeë het äöveral trok. Diek ingepaktj, ónger eine sjtapel daekskes. Mer mét de zörg, de leefdje en de borstvoeding van mien moder. Die borstvoeding is volges häör mien redding gewaest. As ze det weer èns vertèldje, blónk ze hielemaol. 'Mien gerei,' zag ze dan, 'haet dich good gedaon.' Väör häör te plaoge heel ich vol det väöral de verpakking van det gerei mich d'r baove-op haet geholpe.
Mien weeg sjtóng Ónger de Wieje, toen ein sjtök of acht, väöral hiel aoj hoezer achter de kèrk. Oos hoes waas neet de enige boewval. Haelense dörpsfigure wie Jankes Koeëb en Kwietjes Pierke woeëndje dao ouch. Pier waas oze naober. Dae kwoom ein paar daag nao mien gebaorte eine borrel op mich drinke. Käöningin Juliana haaj allein dochters, geine zoon. Ze zooj het landj dus geine käöning kinne gaeve as häöre opvolger. Pier wis natuurlik allang det ich eine magere sjregkedek waas. Väör toch get leefs taege mam te zègke, sjprook hae dees historiese wäörd: 'Doezendj gölje, vrouw, goof de käöningin as ze d'r zoeë eine haaj.'
2020, waek 19
